കോവിഡ് 19 | പുകവലിക്കുന്നവരിൽ രോഗവ്യാപനം കുറവെന്ന് പഠനം; രോഗികളിൽ നിക്കോട്ടിൻ പാച്ചുകൾ പരീക്ഷിക്കാനൊരുങ്ങി ഫ്രാൻസ്

ന്യൂഇംഗ്ലണ്ട് ജേണൽ ഓഫ് മെഡിസിൻ ടെസ്റ്റിൽ കഴിഞ്ഞ മാസം അവസാനത്തോടെ പ്രസിദ്ധീകരിച്ച ഒരു ഗവേഷണ ഫലത്തോട് സമാനമായ കാര്യങ്ങൾ തന്നെയാണ് ഫ്രാൻസിലെ ഗവേഷകരും കണ്ടെത്തിയിരിക്കുന്നത്. ചൈനയിൽ കോവിഡ് രോഗം സ്ഥിരീകരിച്ച് ആയിരം പേരിൽ 12.6% ആളുകൾ മാത്രമായിരുന്നു പുകവലിക്കാറുണ്ടായിരുന്നത്. രാജ്യത്തെ ആകെ പുകവലിക്കാരുടെ എണ്ണം വച്ചു നോക്കുമ്പോൾ ഇത് വളരെ കുറവാണെന്നായിരുന്നു ഇവരുടെ കണ്ടെത്തൽ. ഇത് സാധൂകരിക്കുന്ന പഠനങ്ങൾ തന്നെയാണ് ഫ്രാന്‍സിലും ഉണ്ടായിരിക്കുന്നത്.

അനുമതി ലഭിച്ചാല്‍ ആരോഗ്യ പ്രവർത്തകരിൽ നിക്കോട്ടിൻ പാച്ചുകൾ ഉപയോഗപ്പെടുത്തിയുള്ള പരീക്ഷണം നടത്താനാണ് ആദ്യഘട്ടത്തിൽ ഇവരുടെ നീക്കം.. ഇതു കൊറോണ വൈറസിനെ പ്രതിരോധിക്കുമോ എന്ന് പരിശോധിക്കും. നിലവിൽ ചികിത്സയിൽ തുടരുന്ന രോഗികളിലും ഇത് പരീക്ഷിക്കാനുള്ള അനുമതി ഇവർ തേടിയിട്ടുണ്ട്...

അതേസമയം തന്നെ തുടർ ഗവേഷണം ആവശ്യമുള്ള ഇത്തരമൊരു പഠനത്തിന്റെ അടിസ്ഥാനത്തിൽ ആരും പുകവലിക്കാനും നിക്കോട്ടിൻ പാച്ചുകൾ ഉപയോഗിക്കാനും മുതിരരുതെന്ന പ്രത്യേക നിർദേശവും ഇവർ നൽകുന്നുണ്ട്. നിക്കോട്ടിന്റെ ഗുരുതര പ്രത്യാഘാതങ്ങൾ ആരൂം മറക്കരുതെന്നാണ് പ്രത്യേകമായി തന്നെ ഓര്‍മിപ്പിച്ചിരിക്കുന്നത്.