VT Balram | 'സിപിഎമ്മിന് ഓന്തുപോലെ നിറം മാറാം; പക്ഷേ, നിയമവ്യവസ്ഥ ആ നിലയിലേക്ക് അധ:പതിച്ചിട്ടില്ല': വി.ടി. ബൽറാം

അതേസമയം, കേസ് പിൻവലിക്കണമെന്ന് സർക്കാർ നൽകിയ അപേക്ഷ കോടതി തള്ളിയതോടെ പരിഹാസവുമായി എത്തിയിരിക്കുകയാണ് വി.ടി ബൽറാം എംഎൽഎ. സി പി എമ്മിന് ഓന്തുപോലെ നിറം മാറാമെങ്കിലും ഇന്നാട്ടിലെ നിയമവ്യവസ്ഥ ഇനിയും ആ നിലയിലേക്ക് അധഃപതിച്ചിട്ടില്ലെന്ന് വി.ടി ബൽറാം പറഞ്ഞു.

വ്യവസായമന്ത്രി ഇ.പി ജയരാജൻ, ഉന്നതവിദ്യാഭ്യാസ മന്ത്രി കെ.ടി ജലീൽ എന്നിവർ ഉൾപ്പെടെ ആറുപേരാണ് കേസിലെ പ്രതികൾ. വി.ശിവൻകുട്ടി, സി.കെ സദാശിവൻ, കെ.കുഞ്ഞുമുഹമ്മദ്, കെ.അജിത്ത് എന്നിവരാണ് കേസിലെ മറ്റു പ്രതികൾ. മുഖ്യന്ത്രിക്ക് വി. ശിവൻകുട്ടി നൽകിയ കത്തിന്റെ അടിസ്ഥാനത്തിലാണ് കേസ് പിൻവലിക്കാൻ സർക്കാർ കോടതിയെ സമീപിച്ചത്. ഇതിനെതിരെ പ്രതിപക്ഷനേതാവ് രമേശ് ചെന്നിത്തല ഉൾപ്പെടെയുള്ളവർ തടസ ഹർജിയും കോടതിയിൽ സമീപിച്ചിരുന്നു. പൊതുപ്രവർത്തകരും കോട്ടയം സ്വദേശികളുമായ എംടി തോമസ്, പീറ്റർ മയിലിപറമ്പിൽ എന്നിവർ ഹർജി പിൻവലിക്കരുതെന്ന് ആവശ്യപ്പെട്ട് കോടതിയെ സമീപിച്ചിരുന്നു. നാട്ടുകാർ ചാനലുകളിലൂടെ നിയമസഭയിൽ നടന്ന കയ്യാങ്കളി കണ്ടതാണെന്നും ഇത്തരം പ്രവൃത്തികൾക്കെതിരെ നിയമനടപടി ഉണ്ടായില്ലെങ്കിൽ അത് പൊതുസമൂഹത്തിന് നിയമവ്യവസ്ഥയോടുള്ള വിശ്വാസം നഷ്ടപ്പെടാൻ കാരണമാകുമെന്നും ഹർജിക്കാർ വാദിച്ചു.