Farm Bill Protest | ഈ സ്നേഹം വേറെ ലെവൽ; സമരം ചെയ്യുന്ന എംപിമാരെ ചായയുമായി കാണാനെത്തിയ രാജ്യസഭാ ഉപാധ്യക്ഷൻ ഹരിവംശ് നാരായൺ സിംഗ്

കാർഷിക ബിൽ അവതരണവുമായി ബന്ധപ്പെട്ടുണ്ടായ ഭരണ - പ്രതിപക്ഷ തർക്കങ്ങളാണ് കഴിഞ്ഞദിവസം രാജ്യസഭയിൽ കയ്യാങ്കളിയുടെ വക്കത്തെത്തിയത്. ബിൽ അവതരണം നിർത്തി വെക്കണമെന്ന് ആവശ്യപ്പെട്ട് പ്രതിപക്ഷ എംപിമാർ ചെയറിൽ ഉണ്ടായിരുന്ന രാജ്യസഭ ഉപാധ്യക്ഷൻ ഹരിവംശ് നാരായൺ സിംഗിനെ ഉപരോധിച്ചിരുന്നു. ഇതാണ് പ്രതിപക്ഷ എംപിമാരുടെ സസ്പെൻഷന് കാരണമായത്. രാജ്യസഭ ഉപാധ്യക്ഷനെ കായികമായി കൈയേറ്റം ചെയ്യാൻ പോലും എംപിമാർ ശ്രമിച്ചെന്ന് ചൂണ്ടിക്കാട്ടി രാജ്യസഭ അധ്യക്ഷൻ എം.പിമാർക്ക് എതിരെ നടപടിയെടുക്കുക ആയിരുന്നു.

അതേസമയം, സഹപ്രവർത്തകൻ എന്ന നിലയിലാണ് ഹരിവംശ് നാരായൺ സിംഗ് തങ്ങൾക്ക് രാവിലെ ചായയുമായി വന്നതെന്ന് സസ്പെൻഷനിലായ കോൺഗ്രസ് എം.പി റിപുൻ ബോറ പറഞ്ഞു. എന്നാൽ, സർക്കാരിന്റെ ഭാഗത്തു നിന്നും സമരം ചെയ്യുന്ന തങ്ങളെ ഇതുവരെ ആരും തിരിഞ്ഞുനോക്കിയില്ലെന്നും ബോറ പരാതി പറഞ്ഞു. ഇതിനിടെ ഹരിവംശിനെ പ്രശംസിച്ച് പ്രധാനമന്ത്രി നരേന്ദ്ര മോദി രംഗത്തെത്തി. സഭയിൽ വച്ച് തന്നെ അപമാനിക്കാൻ ശ്രമച്ച എം.പിമാർക്കാണ് ഹരിവംശ് ചായയുമായി എത്തിയത്. ഇത് അദ്ദേഹത്തിന്റെ നല്ല മനസ്സിനെയും എളിമയെയുമാണ് കാണിക്കുന്നതെന്നും ഏറെ ബഹുമാന്യനായ വ്യക്തിയാണ് ഹരിവംശ് നാരായൺ സിംഗ് എന്നും പ്രധാനമന്ത്രി പറഞ്ഞു. ഒപ്പം, രാജ്യസഭ ഉപാധ്യക്ഷനെതിരായ പ്രതിപക്ഷ എംപിമാരുടെ നടപടിയെ പ്രധാനമന്ത്രി അപലപിക്കുകയും ചെയ്തു.